ជម្លោះរវាងលោក ខេម ជាមួយនឹងម្ចាស់ផលិតកម្មថោន បានក្លាយទៅជាប្រធានបទក្តៅមួយនៅលើបណ្តាញសង្គម ខណៈដែលមានការឆ្លើយឆ្លងឌឺដងគ្នាទៅវិញទៅមករវាងភាគីនៅក្នុងជម្លោះ ក៏ដូចជាមានការលូកមាត់ពីអ្នកខាងក្រៅជាច្រើនអ្នក ជាពិសេសគឺអ្នកដែលបានកំពុងបម្រើការនៅក្នុងផលិតកម្មថោន ហើយជំហរនៃការគាំទ្ររបស់ពួកគេគឺផ្សេងៗគ្នា ដោយអ្នកខ្លះក៏គាំទ្រលោក ខេម ខណៈអ្នកខ្លះក៏បានចោទលោក ខេម ថាជាជនរមើលគុណជាដើម។
ជាក់ស្តែងនៅពេលនេះ អ្នកនាង ធី សុវណ្ណថា បានចេញមកប្រកាសសារជាថ្មីម្តងទៀតអំពីករណីជម្លោះរវាងលោក ខេម និងម្ចាស់ផលិតកម្មនេះ នៅលើទំព័រជាផ្លូវការរបស់អ្នកនាងតែម្តង ដែលខ្លឹមសារ ដែលអ្នកនាងបានបង្ហោះនោះមានខ្លឹមសារទាំងស្រុង ដូចខាងក្រោម៖
«ពិបាកសម្របសម្រួលណាស់ ករណី ជម្លោះផលិតកម្មថោន និងលោកខេម ភាគីទាំង២ មានជំហរឹង និងនិយាយយកត្រូវរាងៗខ្លួន តាមការពិនិត្យរបស់ខ្ញុំ លោកខេម អាចប្រឈមុខផ្លូវច្បាប់ ករណី រំលោភកិច្ចសន្យា និងបទបរិហាកេរ្តិជាសាធារណៈ សូមភាគីទាំង២ ចូលតុចរចា រកវិធីឈ្នះៗ បញ្ចប់រឿង»
គួររំលឹកផងដែរថា កាលពីពេលថ្មីៗនេះមានហេតុការណ៍ដ៏គួរឱ្យភ្ញាក់ផ្អើលមួយបានកើតឡើងខណៈដែលផលិតកម្មថោន បានចេញសេចក្តីជូនដំណឹងជាផ្លូវការមួយដល់លោក ប៉ុន សុណារិន ហៅខេម ក្រោយពេលដែលលោកបានចាកចេញទៅច្រៀងនៅផលិតកម្មផ្សេងទៀត ខណៈដែលខ្លួនកំពុងតែជាប់កិច្ចសន្យាជាមួយនឹងផលិតកម្មនៅឡើយ ដែលករណីនេះបានបង្កឱ្យមានការភ្ញាក់ផ្អើលយ៉ាងខ្លាំង។
ការប្រកាសហៅតារាចម្រៀង ខេម នេះដែរបានធ្វើឡើងដោយដាក់កំហិតអោយលោក ខេម ចូលខ្លួនមកដោះស្រាយនៅវេលាម៉ោង ១៥:០០នាទី ថ្ងៃទីនេះ។ កាលពីប៉ុន្មានម៉ោងមុននេះលោក ខេម បានបង្ហោះសារយ៉ាងវែងផ្ញើទៅកាន់ម្ចាស់ផលិតកម្មថោន និងរៀបរាប់រឿងជាច្រើន យ៉ាងធ្ងន់ៗទៅកាន់ម្ចាស់ផលិតកម្មវិញផងដែរ។
